Баатарын Галсансүх

Баатарын Галсансүх

Баатарын Галсансүх Яруу найрагч Б.Галсансүх нь Хэнтий аймгийн Өндөрхаан хотод 1972 онд төрсөн. Хэнтий аймгийн Дадал сумын харъяат. Хэнтий аймгийн 1-р арван жилийн сургууль, ОХУ-ын Москва хотноо Горькийн нэрэмжит утга зохиолын дээд сургуулийн дээд курс тус тус төгссөн. "Ноцтой мэдээ" сонинг үүсгэн байгуулсан. 2017 оноос "Хэрлэн тооно" уран бүтээлчдийн нэгдэл ТББ-ын тэргүүнээр сонгогдсон. "Хүн судлал" (1994), "Яруу найргийн төлөөх зуун жилийн дайн" (2003), "Постмодерн дөрвөн улирал" (2005), "Сэтгэл гэдэг эрхтэн" (2005), "Бурханд хэлэх зөвлөгөө" (2007, 2011), зэрэг номоо хэвлүүлсэн. 2003 онд "Хүн судлал" бүтээлээр МЗЭ-ын шагнал, 2011 онд "Яруу найргийн төлөө зуун жилийн дайн" бүтээлээр Д.Нацагдоржийн шагнал, 2005 онд "Сэтгэл гэдэг эрхтэн" номоор "Алтан өд" шагнал авчээ. БОЛОР ЦОМЫН ЭЗЭН. "Хүн судлал" ном модернист яруу найргийн түүчээ болж, утга зохиолд шинэчлэл хийсэн гэж судлаач нарт үнэлэгдсэн. Мөн түүний бичсэн "Нохойн орон" кино нь олон улсын баримтат киноны наадмаас 18 гранпри хүртжээ.

Хятад сургууль

Саарал тоосгон Хятад сургуулийн байшинг үзвээс

Санаанаас гардаггүй Цагаан хэрэм, Цавчаал боомтын үлдэгдэл шиг санагдаад

Улаан туг ба уралдан шулагнах эрлийз, хурлийз сурагчдыг нь харваас

Урьдын түүхнээ Амбагай хааныг хадсан модон илжиг бодогдоод

Өөхөнд боодолтой үнхэлцэг шиг үрсээ энэ сургуульд тушаах монголчууд ба

Өнөөх Шинжаан, Өвөр Монголыг хятадчилан хүмүүжүүлэх хорих газар шиг үзэгдэх ба

Тортой өргөстэй хашаа ба ТЭР сургуулийн төмөр хашааг харваас

Тэнгэр мэнгэрт байгаа дээдсийн сүнс харанхуйлан хавчуулагдсан ба

Ай, Мөнхийн хөрш минь гээд ам руугаа сэтгэл рүүгээ алагдуулах монголчуудад

Нэг зам, Нэг Хятад гээд

нүдүүлж, зодуулж ,уусч устах урт зам тоссон ба

Нялуун хоол ба үгэнд үхтлээ автах аюултай болсон ба

Оршуулгын газрын бунхан шиг зэвхий энэ сургууль дотор

Одоо ч маниусыг нядлах ирт мэсийг ирлэх ба

Барилгачин ажилчдын дэрэн дороос олдсон цэрэгжлийн сурах бичиг шиг

Баахан дотор санаатай амьдрахгүй л бол болохгүй аймшигтай хятад сургууль ба

Зуун айл, Зайсан толгой гээд зориуд олшруулсан хятад сургууль ба

Зугтаж ид гэх Күнзийн суртал шиг ЗОРГООРоо маниусыг зуусан ба

Эрдэм ухаанаар эцэж цуцатлаа элдүүлэвч цаашаа санаа сууж

Эргээд ээж,ааваа ч эх нутгаа ч ХЯТАД ХООЛоор худалдах ба

Хятад хүн болж төрөөд ханх тавиж явснаас

Харь гаригийн хүн болж төрсөн нь хувь илүү ба

Монгол хүн л ингэж мохошгүйгээр мэдэрч, мэдэж чадах ба

Мянга мянган жил морио эмээллээд урагшаа ухас хийхдээ үүнийг ухсан ба

Агуу есөн НАЙРАГЧИЙН сэтгэлд хоногшсон есөн ШҮЛЭГ
 
Хөгжмийн зохиолч Нацагийн Жанцанноров Шинжлэх ухааны докторын зэрэг хамгаална
Сэтгэгдэл (0)
Анхаар!
Та сэтгэгдэл бичихдээ хууль зүйн болон ёс суртахууныг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд хариуцлага хүлээхгүй. !!!