Мишигийн Цэдэндорж

Мишигийн Цэдэндорж

\1932-1982\ Мишигийн Цэдэндорж үзэл суртлын хүнд лантуун дор уран бүтээл нь зохиолчтойгоо хамт дарагдаж байсан яруу найрагч. Түүний шүлэг зохиолоос сайн сайхан гэдэг нийгмийн тогтолцоонд бус харин хүний сайхан сэтгэл, хүн чанарт л оршдог болохыг тод харуулдаг. Мөн хүний аз жаргал гэгч эрх ямбанд биш, харин ЭРХ ЧӨЛӨӨ-нд буй болохыг тэрээр тунхагласан байдаг. Өөртөө эдлэх өчүүхэн эрх ямбын төлөөнөө өөрийн ард түмний эрх чөлөө, тусгаар тогтнолыг арилжихад бэлэн явдаг өдгөө цагийн эрхмүүд хэрэв дорвитойхон сургуульд сурсансан бол түүний бүтээлтэй танилцах байсан биз ээ. Хэрэвзээ түүний бүтээл, туурвилын амт шимийг хүртсэн бол ЭХ ОРОН, ЭРХ ЧӨЛӨӨ хоёрыг эрхэм дээд жаргал гэдгийг ойлгох ч байсан байж магадгүй. Эрхэм уншигч авхай танд эрх чөлөөний дуулал, арилшгүй мөн чанарт, мохошгүй зоригт Монголын нэгэн яруу найрагч Мишигийн Цэдэндоржийн бүтээлээс хүргэж байна. Таалан тольдмуу...

Болохгүй юм гэж орчлонд хаана байна

Болохгүй юм гэж орчлонд хаана байна ?

Борхон туулай арсланг ч дийлнэ

Болзоот нөхөр нь зовлонд учрахад

Босовч суувч хамт гэж тангарагласан

Бодлогын амраг нь өөрийг сонгоно

Болно болно бүгд болно

Болохгүй юм гэж орчлонд хаана байна.

Тэгэхгүй юм гэж орчлонд юу байна ?

Тэргэл саранд ч очиж нутаглана

Тээршаасан юмс шүтээн болно

Тэнгэр минь гэсэн юмс дайсан болно

Тэнхэлгээсээ орчлон мултарч болно

Тэгнэ тэгнэ, бүгд тэгнэ

Тэгэхгүй юм гэж орчлонд юу байна ?

Санахгүй юм гэж хүнд юу байна ?

Сайныг сургасан багшаа ч худалдана

Садан төрлөө ч алахыг бодно

Сансрын салхийг ч өмчлөхийг хичээнэ

Саар санааг ялах сайн санаа юу вэ ?

Санана санана, бүгд санана

Санахгүй юм гэж хүнд юу байна ?

Адал орчлонд эрдэнэт биеийг өсгөсөн

Ачит ээжийн цагаан сүүг хор гэхэд би үнэмшихгүй

Ангаахайн чинээ байхаас бүүвэйлсэн үг

Аялгуу сайхан монгол хэлийн хомс гэхэд би итгэхгүй

Эх орон гэдэг үгийн амин сүнс болсон

Ээж, хэл хоёроосоо урвана гэж надад үгүй.

Ибн Синагийн шүлгүүд
 
ЗАГАЛ
Сэтгэгдэл (0)
Анхаар!
Та сэтгэгдэл бичихдээ хууль зүйн болон ёс суртахууныг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд хариуцлага хүлээхгүй. !!!