Мишигийн Цэдэндорж

Мишигийн Цэдэндорж

\1932-1982\ Мишигийн Цэдэндорж үзэл суртлын хүнд лантуун дор уран бүтээл нь зохиолчтойгоо хамт дарагдаж байсан яруу найрагч. Түүний шүлэг зохиолоос сайн сайхан гэдэг нийгмийн тогтолцоонд бус харин хүний сайхан сэтгэл, хүн чанарт л оршдог болохыг тод харуулдаг. Мөн хүний аз жаргал гэгч эрх ямбанд биш, харин ЭРХ ЧӨЛӨӨ-нд буй болохыг тэрээр тунхагласан байдаг. Өөртөө эдлэх өчүүхэн эрх ямбын төлөөнөө өөрийн ард түмний эрх чөлөө, тусгаар тогтнолыг арилжихад бэлэн явдаг өдгөө цагийн эрхмүүд хэрэв дорвитойхон сургуульд сурсансан бол түүний бүтээлтэй танилцах байсан биз ээ. Хэрэвзээ түүний бүтээл, туурвилын амт шимийг хүртсэн бол ЭХ ОРОН, ЭРХ ЧӨЛӨӨ хоёрыг эрхэм дээд жаргал гэдгийг ойлгох ч байсан байж магадгүй. Эрхэм уншигч авхай танд эрх чөлөөний дуулал, арилшгүй мөн чанарт, мохошгүй зоригт Монголын нэгэн яруу найрагч Мишигийн Цэдэндоржийн бүтээлээс хүргэж байна. Таалан тольдмуу...
Энэ мэдээ хуучирсан буюу 2022/04/25-нд нийтлэгдсэн мэдээ болно.

Морин хуур

Унаган хөлгөө дурсан

Уран хуураа татаж

Утгын яруу дуундаа

Уярж хатуужиж суухдаа

Хорвоогийн хамаг явдлыг

Хоёрхон чавхдасаар ярьдаг

Хосгүй нэгэн овог

Азийн цээжинд нутагтай

Жонон хараа амилуулсан

Жороо хоёр чавхдас нь

Бөмбөлзүүлэн тэшээд гарахаараа

Дөрвөн цагийн гишгэдэлтэй

Хорвоо гэдэг өргөн

Хотол гэдэг олон

Холбож яаж дуулахаараа

Хоёрхон чавхдасанд багтаана вэ

Дөрвөн туурайн төвөргөөн

Дөхсөөр дөхсөөр тодорно

Хоёрхон чавхдасан дээгүүр

Хойнох тоос нь ч зурайна

Хоёрхон чавхдасан дээгүүр

Урдах зам нь ч дурайна

Алаг зүрхний минь цохилт

Арван хурууны авьяасанд

Хоёр чавхдасаар лугшин

Хонгор амрагаа мөрөөднө

Хоёр чавхдасаар лугшин

Хүслийн далайд умбана

Хоёрхон чавхдасны эгшгэнд

Хорвоо юундаа баясана вэ

Буурал хорвоогийн түүхийг

Буман олны хүслийг

Холбож яаж дуулахаараа

Хоёрхон чавхдасанд багтаана вэ

Хорвоо гэдэг хоёрхон өнгө

Хар цагаан хосолно

Хотол гэдэг хос амраг

Зовлон, жаргал хослоно

Өргөн орчлонд хоёрхон чавхдас бий

Өдөр гэж бий. Шөнө гэж бий.

Өнөр олонд хоёрхон тохиол бий

Учрал гэж бий. Хагацал гэж бий.

Хорвоо гэдэг өргөн ч

Хотол гэдэг олон ч

Хоёрхон чавхдасанд багтааж

Холбохын учир энээ

Дөрвөн туурайн төвөргөөн

Дөхсөөр дөхсөөр тодорно

Хоёрхон чавхдасан дээгүүр

Хойнох тоос нь зурайна

Хоёрхон чавхдасан дээгүүр

Урдах зам нь ч дурайна

Алаг зүрхний минь цохилт

Арван хурууны авьяасанд

Хоёр чавхдасаар лугшин

Хонгор амрагаа мөрөөднө

Хоёр чавхдасаар лугшин

Хүслийн далайд умбана

Хорвоогийн хамаг явдлыг

Хоёрхон чавхдасаар ярьдаг

Хосгүй нэгэн овог

Азийн цээжинд нутагтай

Жонон хараа амилуулсан

Жороо хоёр чавхдас нь

Бөмбөлзүүлэн тэшээд гарахаараа

Дөрвөн цагийн гишгэдэлтэй

Болохгүй юм гэж орчлонд хаана байна
 
Жамуха сэцэний совин
Энэ мэдээ хуучирсан буюу 2022/04/25-нд нийтлэгдсэн мэдээ болно.