Хиргүй тунгалаг, уужим саруул хөх огторгуй
Хэзээ насанд эргэн байгч наран саран хоёр
Хэмжээт цагийн тохиол бүхэнд дахин дахин учирна
Хэлбэрэлтгүй энэ бэлгийг үлгэр авч саная
Хөх тэнгэр чи минь энд бие амар суугаарай
Хөөрхий нар сар бид тивийг эргэн одоё
Хөндлөн бүрхэгч саармаг муу үүлээр битгий бүрхэгд
Хөнөөгч гаригт баригдалгүй явж ирж учирья
Төрөл тутамдаа хоёулаа үл хагацахыг
Төгс цогт багш минь адисла
Илт өндөр бэрх уулын хадан хонгио ба
Идэр наст хүчин төгс хүрэн тас бид хоёр
Эргэх цагийн тохиол бүхэнд дахин дахин учирна
Эвдрэлтгүй энэ бэлгийг үлгэр авч саная
Хадны агуй чи минь энд бие амар суугаарай
Харцага тас шувуун бид отгоргуйд халин ниснэ
Хатуу хүчит аянгын суманд эвдрэлгүй байгаарай
Хавх урхинд баригдалгүй явж ирж учирья
Төрөл тутамдаа хоёулаа үл хагацахыг
Төгс цогт багш минь адисла
Урт үргэлжид дөлгөөнөөр урсагч мөрөн ба
Уран сайхан алтан нүдэт дуртмал загас хоёр
Улирах цагийн тохиол бүрт дахин дахин учирна
Урвалтгүй энэ бэлгийг үлгэр авч саная
Ганга мөрөн чи минь энд бие амар суугаарай
Гавшгай загас бид усны салбараар бядан одно
Газрын аяар явж, гүний голд битгий татагдаарай
Гасалгагч сэрээнд өртөлгүй явж ирж учирья
Төрөл тутамдаа хоёулаа үл хагацахыг
Төгс цогт багш минь адисла
Уужим хэрмэнд нь ургуулсан өнгө тунсаг лянхуа ба
Уяхан эгшиг дуулан нисэгч залуу зөгий хоёр
Урин цагийн тохиол бүхэнд дахин дахин учирна
Ултай энэ бэлгийг үлгэр авч саная
Шимт цэцэг минь энд бие амар суугаарай
Шидэг зөгий би чинь ой цэцгийг хэсэн одно
Ширүүн мөндөр, хяруу салхинд дайрагдалгүй байгаарай
Сэрэмж алдаж, түймэрт өртөлгүй явж ирж учирья
Төрөл тутамд хоёулаа үл хагацахыг
Төгс цогт багш минь адисла
Саран мэт мэлтэрсэн бодисад чи минь
Саран эрэгч, үнэн сэтгэл баригч бид хоёр
Салалтгүй эртний ерөөлөөр дахин дахин учирна
Санаанд зохист энэ бэлгийг үлгэр авч саная
Амраг нөхөр минь чи минь энд бие амар суугаарай
Адаг муу ах чинь орон хэсэн одно
Ад тотгор өвчингүй өлмий юугаан бататгаарай
Амар мэнд номыг бүтээн явж ирж учирья
Төрөл тутамд хоёулаа үл хагацахыг
Төгс цогт багш минь адисла
